პოლიტიკური პარტიების სახელმწიფო ბიუჯეტიდან დაფინანსების საკითხს საქართველოს კანონები  მოქალაქეთა პოლიტიკური გაერთიანებების შესახებ და საარჩევნო კოდექსი  არეგულირებს.

მოქალაქეთა პოლიტიკური გაერთიანებების შესახებ კანონის თანახმად პოლიტიკური პარტიების სახელმწიფო ბიუჯეტიდან დაფინანსების მიზანია ჯანსაღი, კონკურენტუნარიანი პოლიტიკური სისტემის ჩამოყალიბების ხელშეწყობა და პოლიტიკური პარტიების საქმიანობის ფინანსური მხარდაჭერა.

ყოველწლიურად საქართველოს სახელმწიფო ბიუჯეტიდან  თანხა გამოიყოფა იმ პოლიტიკურ პარტიებზე(ბლოკში შემავალ პარტიებზე) რომლებმაც ბოლო საპარლამენტო ან ადგილობრივი თვითმმართველობის ორგანოთა  პროპორციული სისტემით მთელ ქვეყანაში ჩატარებულ საერთო არჩევნებში მიიღეს არჩევნებში მონაწილე ამომრჩეველთა ხმების 3% ან 3%-ზე მეტი, ან თუ პარტიის(ბლოკის) წარდგენით არჩეულ იქნა მაჟორიტარი პარლამენტის წევრი და ეს პარტია საქართველოს პარლამენტში წარმოდგენილია ფრაქციით.

საბიუჯეტო დაფინანსების სახით გამოყოფილი თანხა შედგება საბაზო ნაწილის, პროპორციული სისტემით არჩეული პარლამენტის წევრისათვის გამოყოფილი დანამატისა და მიღებული ხმების რაოდენობის შესაბამისი კომპონენტისაგან.

¹პარტიის მიერ მისაღები საბიუჯეტო დაფინანსება გაიანგარიშება შემდეგი ფორმულით:

Z=B+(M*600*12)+(L*100*12)+(V*1,5)+(W*1)+(H),

სადაც Z არის პარტიის მიერ მისაღები საბიუჯეტო დაფინანსების ოდენობა;

B – საბაზო დაფინანსების ოდენობა თუ პარტიამ(ბლოკმა) მიიღო 3%  -დან 6% - მდე - 300 000 ლარი, 6% მეტი - 600 000 ლარი;

M – პროპორციული სისტემით არჩეული 30 და 30-მდე პარლამენტის წევრთა რაოდენობა - თითო წევრზე თვეში 600 ლარი;

L – პროპორციული სისტემით არჩეული 30 წევრის ზემოთ პარლამენტის წევრთა რაოდენობა - თითო წევრზე თვეში 100 ლარი;

V – 200 000 ამომრჩევლამდე მიღებული ხმების ოდენობა - ერთი ხმა 1,5 ლარი;

W – 200 000 ამომრჩევლის ზემოთ მიღებული ხმების ოდენობა - ერთი ხმა 1 ლარი ;

H – პარტია, რომელიც ბოლო საპარლამენტო არჩევნებში მონაწილეობის მიზნით რეგისტრირებული იყო საქართველოს ცენტრალურ საარჩევნო კომისიაში და რომლის წევრიც არჩეულ იქნა საქართველოს პარლამენტის წევრად, თუ იგი შექმნის საპარლამენტო ფრაქციას - H=300 000 ლარს.

აგრეთვე პარტია იღებს დანამატს საბაზო დაფინანსების 30%-ის ოდენობით, თუ ამ პარტიის ან შესაბამისი საარჩევნო ბლოკის მიერ იმ არჩევნებზე წარდგენილ პარტიულ სიაში (ადგილობრივი თვითმმართველობის ორგანოთა არჩევნებზე − ყველა პარტიულ სიაში), კანდიდატთა პირველ, მეორე და ყოველ მომდევნო ათეულში ერთიმეორისაგან განსხვავებული სქესი წარმოდგენილია სულ მცირე 30%-ით.

საარჩვნო ბლოკების შემთხვევაში მიღებულ ხმებზე მიბმული დაფინანსება  და საბაზო დაფინანსება  თანაბრად ნაწილდება საარჩევნო ბლოკში შემავალ პარტიებს შორის.

²გარდა  ამ გათვალისწინებული საბიუჯეტო დაფინანსებისა, საქართველოს სახელმწიფო ბიუჯეტიდან ყოველწლიურად გადაირიცხება თანხა ფონდში, რომლის მიზანიცაა პარტიებისა და არასამთავრობო სექტორის განვითარებისა და ჯანსაღი, კონკურენტუნარიანი პოლიტიკური სისტემის ჩამოყალიბების ხელშეწყობა. ფონდიდან თანხა გაიცემა მხოლოდ კვლევების, სწავლების, კონფერენციების, მივლინებების, რეგიონული პროექტების, ამომრჩეველთა სამოქალაქო და საარჩევნო განათლების პროექტების დაფინანსების მიზნით.

ფონდში საქართველოს სახელმწიფო ბიუჯეტიდან გადასარიცხი თანხა ყოველწლიურად შეადგენს პარტიებზე პირდაპირ გასანაწილებელი თანხის ნახევარს. ამ თანხის 50%  ნაწილდება პარტიებზე, მათ მიერ მისაღები საბაზო დაფინანსების პროპორციულად, ხოლო 50% – არასამთავრობო ორგანიზაციებზე.

გარდა ყოველწლიურად სახელმწიფო ბიუჯეტიდან გამოყოფილი თანხისა, ყოველ საარჩევნო წელს პოლიტიკური პარტიებს საარჩევნო კამპანიის ფინანსური მხარდაჭერისათვის საქართველოს სახელმწიფო ბიუჯეტიდან დამატებით გამოეყოფა შემდეგი დაფინანსება:

• ³არჩევნების დღეს საოლქო და საუბნო საარჩევნო კომისიებში წარმომადგენლობის უზრუნველსაყოფად - არჩევნებში მონაწილე კვალიფიციური საარჩევნო სუბიექტი  დაფინანსებას მიიღებს ყოველ საარჩევნო უბანზე 100 ლარის და ყოველ საარჩევნო ოლქზე 150 ლარის ოდენობით, საარჩევნო ბლოკი -  საარჩევნო უბანზე 150 ლარის და ყოველ საარჩევნო ოლქზე 200 ლარის ოდენობით.
• ⁴სატელევიზიო რეკლამის განთავსების ხარჯების დასაფარავად - იმ პარტიებს რომლებსაც ბოლო საერთო არჩევნების შედეგების მიხედვით წარმოეშვათ დაფინანსების მიღების უფლება არაუმეტეს 600 000 ლარისა.
• ⁵საარჩევნო კამპანიისას გაწეული ხარჯების დასაფარავად  - საარჩევნო სუბიექტს, რომელიც საპარლამენტო არჩევნებში მიიღებს 5%-ს ან მეტს, ხოლო საპრეზიდენტო არჩევნების პირველ ტურში მიიღებს არჩევნებში მონაწილე ამომრჩეველთა ხმების 10%-ს ან მეტს, ერთჯერადად  გამოეყოფა არაუმეტეს 1 000 000 ლარი, ხოლო  საკრებულოების საერთო არჩევნებში მიიღებს არჩევნებში მონაწილე ამომრჩეველთა ხმების 3%-ს ან მეტს  ერთჯერადად მიიღებს არაუმეტეს 500 000 ლარს;