„სამართლიანი არჩევნები“ მეორე ტურის წინასაარჩევნო პერიოდში რამდენიმე დარღვევაზე საუბრობს. როგორც ორგანიზაციის მიერ მომზადებულ, არჩევნების მეორე ტურის წინასაარჩევნო პერიოდის მონიტორინგის შუალედურ ანგარიშშია აღნიშნული, ძირითადად ოპოზიციური პარტიის კანდიდატები სხვადასხვა ოლქში მათი მხარდამჭერებისა თუ კოორდინატორების მიმართ ზეწოლის და დაშინების ფაქტებზე საუბრობენ.
არასამთავრობო ორგანიზაციამ აღნიშნული ფაქტების გადამოწმების შედეგად, რამდენიმე ფაქტზე გაამახვილა ყურადღება, მათ შორის ფიზიკური დაპირისპირებებისა და სავარაუდოდ, პოლიტიკური ნიშნით ზეწოლა-მუქარაზე.

”მხარდამჭერების მიმართ ხელისუფლების წარმომადგენელებისა და მმართველი პარტიის აქტივისტების მიერ განხორციელებულ ზეწოლაზე ძირითადად, „ერთიანი ნაციონალური მოძრაობისა“ და „თავისუფალი დემოკრატების“ კანდიდატებმა გაავრცელეს. „სამართლიანი არჩევნების“ ინფორმაციით, მეორე ტურის წინასაარჩევნო პერიოდში ადგილი ჰქონდა ფიზიკური დაპირისპირების - 2, სავარაუდოდ პოლიტიკური ნიშნით ზეწოლა-მუქარის - 8; სავარაუდოდ პოლიტიკური მოტივით სამსახურიდან გათავისუფლების - 1, ადმინისტრაციული რესურსის გამოყენებისა და ამომრჩევლის მოსყიდვის - 2 შემთხვევას. წინასაარჩევნო პერიოდში გამოვლინდა 2 ფაქტი, როდესაც საუბნო საარჩევნო კომისიის წევრები პარტია „ქართული ოცნების“ საარჩევნო შტაბში იმყოფებოდნენ”, - ნათქვამია ”სამართლიანი არჩევნების” შუალედურ ანგარიშში.

ორგანიზაცია ასევე აღნიშნავს, რომ 8 ოქტომბერს ზუგდიდისა და მარნეულის საარჩევნო ოლქების 3 უბანზე მომხდარმა ძალადობრივმა ფაქტებმა, მეორე ტურის წინასაარჩევნო პერიოდს ნეგატიური ფონი შეუქმნა.

ipn.ge