საუბნო-საარჩევნო კომისიების წევრების გაწვევის ვადა დღეს, 18:00 საათზე იწურება. როგორც ცესკოს პრესსპიკერმმა ანა მიქელაძემ განაცხადა, ცენტრალურმა საარჩენო კომისიამ 17 ოქტომბერს მიიღო დადგენილება და პირველი ტურებისთვის შექმნილი საუბნო-საარჩევნო კომისიები უფლებამოსილი არიან განახორციელონ ფუნქციები მეორე ტურებისთვის.

მისივე განმარტებით, პარტიის მიერ დანიშნული საუბნო-საარჩევნო კომისიისათვის უფლებამოსილების ვადამდე შეწყვეტის შემთხვევაში, შეტყობინების მიღებიდან 2 დღის ვადაში პარტიას აქვს შესაძლებლობა დანიშნოს კომისიის ახალი წევრი.

”იმ შემთხვევაში, თუკი პარტია არ გამოიყენებს კანონმდებლობით განსაზღვრულ ამ უფლებამოსილებას, მაშინ საოლქო საარჩევნო კომისიას აქვს უფლებამოსილება გამოაცხადოს კონკურსი და ამის შედეგად, პროფესიული ნიშნით აირჩიოს საუბნო-საარჩევნო კომისიის წევრები.
მნიშვნელოვანია ის გარემოება, რომ კენჭისყრის დღემდე, არაუგვიანეს მეოთხე დღისა არის შესაძლებელი საუბნო-საარჩევნო კომისიის წევრების გამოწვევა. დღეს, 18:00 საათზე იწურება აღნიშნული ვადა”, - განმარტა ანა მიქელაძემ.

მისივე თქმით, კანონმდებლობით არის განსაზღვრული, რომ საუბნო-საარჩევნო კომისია შედგება 13 წევრისგან. 13 წევრიდან 6 არის პროფესიული ნიშნით არჩეული, 7- პარტიების მიერ დანიშნული.

ipn.ge