მოძრაობა ”სახელმწიფო ხალხისათვის” წევრი გიორგი ვაშაძე ვერ ხედავს ვერანაირ საფუძველს, თუ რატომ უნდა შეუერთდეს ”ქართული ოცნების” მიერ შეთავაზებულ მემორანდუმს, ვინაიდან ამ მემორანდუმს არანაირი იურიდიული ძალა არ ექნება, - ასე ეხმაურება გიორგი ვაშაძე ხელისუფლების შეთავაზებას, რომ პარტიებმა გააფორმონ ე.წ. სამშვიდობო მემორანდუმი არჩევნებთან დაკავშირებით.

”გუშინ ნინოწმინდაში ჩვენი 6 მხარდამჭერი სამოქალაქო ფორმებში ჩაცმულმა სამართალდამცველებმა დაკითხეს, გამოკითხეს და ა.შ. რა მნიშვნელობა აქვს ფარატინა ფურცლების ხელმოწერას, თუ სამართალდამცველი ორგანოები რეაგირებას არ აპირებენ კონკრეტულ ფაქტებზე. მე ვფიქრობ, რომ ეს არის უბრალოდ პოლიტიკური განცხადება და მეტი არაფერი. თუკი ხელისუფლებას სურს უსაფრთხო საარჩევნო გარემო, ეს მან უნდა მოახერხოს სამართალდამცველების მეშვეობით. ახლა ვერ ვხედავ ვერანაირ საფუძველს, თუ რატომ უნდა შევუერთდე მემორანდუმს, რომელსაც არანაირი იურიდიული ძალა არ აქვს”, - განაცხადა გიორგი ვაშაძემ.

„ქართული ოცნება“ საარჩევნო სუბიექტებს არჩევნების კორექტულ და მშვიდობიან გარემოში ჩატარების უზრუნველსაყოფად სპეციალური მემორანდუმის გაფორმებას სთავაზობს.

ipn.ge