საპარლამენტო უმცირესობის წევრი გიორგი ვაშაძის განცხადებით, მან შესაძლოა, „ნაციონალური მოძრაობა" დატოვოს და პოლიტიკიდან საერთოდ წავიდეს.
როგორც ვაშაძემ ჟურნალისტებთან საუბრისას აღნიშნა, „იგი სამეგრელოში აღმოჩენილი ადამიანთა წამებისა და გაუპატიურების ამსახველი ფარული ვიდეოჩანაწერების საქმის გამოძიების დასრულებას ელოდება და გადაწყვეტილებას ამის შემდეგ მიიღებს".

ამასთან, დეპუტატი თვლის, რომ „აღმოჩენილი კადრები და ფირები ბოლო არ არის და ფარული ვიდეოჩანაწერების გამოაშკარავების მხრივ ხელისუფლების განსაკუთრებით გააქტიურება სექტემბერში მოხდება".

„ჩემი მიზანი გამოძიების მალე დასრულებაა. ზუსტად ამიტომ არ მოგვყვება ხელისუფლება ამ საკითხთან დაკავშირებით საგამოძიებო კომისიის შექმნაზე - მას არ სურს დამნაშავეების პოვნა. მზად ვარ, ბოლომდე ვიმუშავო და ბოლოს და ბოლოს, მზად ვარ, პოლიტიკიდან საერთოდ წავიდე. ჩემი თვითმიზანი პოლიტიკაში ყოფნა არ არის. პირადად მე – გიორგი ვაშაძეს მინდა, წერტილი დაესვას გირგვლიანის, რობაქიძის, 26 მაისის, ვიდეოკადრების, წამების საქმეებს და ყველა დამნაშავე გამოვლინდეს. არ მაინტერესებს, ჩვენს გუნდში ამის წინააღმდეგ ვინ წავა. ამ პარტიაში დღეს იმიტომ ვარ, რომ ადამიანების დიდი ჯგუფი სწორედ ამ აზრზეა. თუ დავინახავ, რომ მარტო აღმოვჩნდები, პარტიას იმავე დღეს დავტოვებ”,- განაცხადა გიორგი ვაშაძემ.

წყარო: frontnews.ge