დღეს პარლამენტის ბიუროს სხდომით გაიხსნა 2008 წლის მოწვევის პარლამენტის ბოლო საშემოდგომო სესია. ბიუროს სხდომას პარლამენტის თავმჯდომარის მოადგილე რუსუდან კერვალიშვილი უძღვებოდა. ბიუროს წევრებმა განიხილეს ახალი საკანონმდებლო ინიციატივა საქართველოს ორგანულ კანონში „საქართველოს საარჩევნო კოდექსი“ ცვლილების შეტანის შესახებ. ცვლილება კოდექსის 57-ე მუხლის მე-6 პუნქტს შეეხება.
კანონის დღემდე მოქმედი რედაქციით, თუ პოლიტიკური პარტიის მხრიდან სერიოზული ფინანსური დარღვევებია ან მან არ წარადგინა ანგარიში, მაშინ შესაძლებელი ხდება, რომ არჩევნებზე ამ პარტიის ხმები არ იყოს დათვლილი. ცვლილების მიხედვით პარტიის ხმების არდათვლის ნაცვლად წესდება ჯარიმა. კერძოდ, „თუ საარჩევნო სუბიექტები, რომლებიც მიიღებენ ამ კანონით დადგენილ ხმების საჭირო რაოდენობას, დადგენილ ვადაში არ წარადგენენ საარჩევნო კამპანიის ფონდის ანგარიშს სახელმწიფო აუდიტის სამსახურის მიერ დაჯარიმდებიან ათი ათასი ლარით. წარდგენილ ანგარიშში ხარვეზის არსებობის შემთხვევაში სახელმწიფო აუდიტის სამსახურმა წერილობით უნდა გააფრთხილოს საარჩევნო სუბიექტი და უნდა მოსთხოვოს ხარვეზის გამოსწორება ორი დღის ვადაში. ხარვეზის გამოუსწორებლობის შემთხვევაში საარჩევნო სუბიექტი დაჯარიმდება სამი ათასი ლარით.“

შეგახსენებთ, რომ კანონმდებლობის თანახმად, თუ არ იქნება გადაუდებელი აუცილებლობა, არჩევნებამდე ერთი თვის განმავლობაში პლენარული სხდომა არ იმართება. გადაუდებელი აუცილებლობის შემთხვევაში კი, არჩევნებამდე პლენარული სხდომის მოწვევის უფლება პარლამენტის თავმჯდომარეს აქვს.