როგორც “ბურჯანაძე – ერთიანი ოპოზიციის” თბილისის მერობის კანდიდატმა დიმიტრი ლორთქიფანიძემ შემაჯამებელ პრესკონფერენციაზე განაცხადა, ხელისუფლება საკუთარი ძალაუფლების ტყვეობიდან უნდა გათავისუფლდეს.

ლორთქიფანიძის თქმით, მან წინასაარჩევნო კამპანიის ფარგლებში მხოლოდ თბილისში 200-ზე მეტი შეხვედრა ჩაატარა, რომელმაც კიდევ ერთხელ გამოავლინა, რომ დედაქალაქის მოსახლეობა უმძიმეს პირობებში ცხოვრობს.

“ხელისუფლება რომ ჰქონდეს სრული წარმოდგენა, რა მძიმე სოციალურ მდომარეობაში იმყოფება მისი მოსახლეობა, ნამდვილად აიღებდა ხელს იმ ავანტიურისტულ ჩანაფიქრებზე, რასაც ერთი მხრივ, ცენტრალური ხელისუფლების მხრიდან გაზრდილი სახელფასო დანამატების და ჯიპების საკითხი ჰქვია და მეორე მხრივ, თვითმმართველობის დონეზე თბილისის საკრებულოს უპრეცედენტოდ გაზრდილი მადის საკითხს წარმოადგენს. პირდაპირ შემიძლია გითხრათ, რომ ის, რაც თბილისის ბიუჯეტს დაემართა, როდესაც 64%-ით გაიზარდა შრომის ანაზღაურების მუხლი, ესეც არ იკმარეს და საგზაო ინფრასტრუტურის ამოკლებული 3 მილიონიც გადაინაწილეს, ამის შემდგომ 28 ახალი ავტომობილი შეიძინეს, ეს ყველაფერი აკლდება იმ ადამიანებს, რომლებიც სისხლის ჩაბარებით არჩენენ ოჯახებს”, - განაცხადა დიმიტრი ლორთქიფანიძემ და აღნიშნა, რომ ამ და სხვა მწვავე პრობლემების გამოსასწორებლად ამომრჩევლებმა ხმა კოალიცია “ბურჯანაძე – ერთიანი ოპოზიციის” კანდიდატებს უნდა მისცეს.

ლორთქიფანიძემ საზოგადოებას აქტიურობისკენ მოუწოდა. 

http://pia.ge/show_news.php?id=16782&lang=geo